Sa Pananaw ng Hindi Adik

Maraming uri ng bato. May tinatawag na batong-buhay. Ito ay puting bato na nahahawig sa marmol at diumano ay lumalaki. May tinatawag na batong-hasaan. Ito ay bato na pinaghahasaan ng matatalim na kasangkapan. May tinatawag ding batong-panghilod. Ito ay bato na ginagamit ng ating mga lolo at lola upang pantanggal ng libag tuwing naliligo. At marami pang uri ng bato na maaaring mabasa sa UP Diksiyonaryong Filipino.

Sige na nga, idagdag pa natin dito ang mala-alamat na bato na isinusubo ni Darna upang magkaroon ng lakas sa pakikipaglaban sa kasamaan at ang kasalukuyang pinuno ng ating kapulisan na si Ronald “Bato” Dela Rosa na pursigido sa pagtupad ng kaniyang mga tungkulin. Tunay ngang maraming magagandang bagay ang naiaambag ng bato sa buhay ng mga Pilipino.

Bato sa Sachet
Gayunman, may namumukod-tanging bato na taliwas sa mabubuting bagay na likha ng mga bato na binanggit sa itaas. Walang iba kundi ang “bato” o shabu na kalimitang ipinagbibili nang naka-sachet.

Shabu ang pinaikling tawag sa methapetamine hydrochloride na agad na makikilala dahil sa mala-kristal nitong katangian. Sa mga hindi gumagamit nito, tulad ko, malimit itong itampok sa mga pelikula kung saan ang mga kontrabida ay kalimitang may eksenang gumagamit nito. Tinutunaw nila ang shabu sa apoy ng lighter bago hithitin. Pagkatapos, magbabagong-anyo ang mga kontrabidang ito na lalong magmumukhang demonyo (lagyan ng SFX). Magiging sandaang porsiyento rin ang kanilang lakas ng loob upang simulan ang mga seremonya ng pandedemonyo.

At hindi lamang sa pelikula masasaksihan ang mga seremonya ng pandedemonyo ng mga kontrabidang durugista. Higit itong nakakatakot dahil nagaganap ito sa tunay na buhay. Nariyan ang seremonya ng pagnanakaw, ang seremonya ng pagpatay, at seremonya ng panghahalay na karaniwang binibiktima ang mga walang muwang na nilalang.

At ayaw na ayaw natin ng kanilang mga seremonya ng pandedemonyo, kabilang na si Pangulong Rodrigo Duterte. Sa pagsisimula ng administrasyong Duterte, higit na naging aktibo ang pamahalaan sa pagsugpo sa mga durugista. May listahan ding inilabas ang pangulo na nagsasaad ng mga pangalan ng mga lingkod-bayan na nasasangkot sa droga. May mga babala rin sa mga politikong magpoprotekta sa mga druglord o sindikato ng droga. May mga kilala o makapangyarihang tao na ang namatay sa labanan sa droga. At sa mga oras na isisusulat ito, patuloy na dinidinig sa Senado ang ukol sa nakulimbat na shabu sa Bureau of Customs (BoC) noong Mayo 2017 na nagkakahalaga ng 4.6 bilyong piso. Maraming pangalan ng naglalakihang tao sa lipunan ang lumutang at maaaring maraming pagmamaniobra ang naganap at magaganap sa proseso ng imbestigasyon dahil mga pansariling interes ang nakasalalay sa maanomalyang kasong ito. Hahayaan na lamang ba natin sa mga kamay ng mga “nag-aral ng batas” ang proseso ng imbestigasyong ito?

Kontrobersiya ng EJK
Sa kabilang dako kasi ng ating lipunan, habang papasimula ang aktibong pagkilos ng kapulisan sa paglaban sa droga, naging kontrobersiyal ang mga hakbang kung paano ito naiimplementa, tulad na lamang ng Oplan Tokhang.

Sa Oplan Tokhang, naging kakila-kilabot ang ibinigay na kapangyarihan ng estado sa ating kapulisan na naging bida-kontrabida sa buhay ng maralitang durugista, maging sa pamilya ng mga ito. Naging bida-kontrabida rin ang mga kapulisan sa pananaw ng mga nagsusulong ng mga karapatang-pantao dahil mas marami ang na-ekstrahudisyal na pinatay o ektrajudicial killing (EJK). Ang mga na-EJK ay hindi na pinadaan o kailanman ay hindi na makadadaan sa regular na proseso ng hukuman dahil sila ay pinatay na. Hindi na sila nabigyan ng pagkakataon na makaharap nang personalan ang mga “nag-aral ng batas” upang ipagtanggol ang kanilang sarili o humingi ng kapatawaran sa kanilang mga kasalanan.

Matagal nang minamanmanan ’yan. Pinaputukan kami. Nanlaban siya. May nakitang sachet ng shabu sa bulsa. Positibo sa droga. Ilan lamang ito sa mga dahilan ng ating kapulisan kapag may nabalitang na-EJK. Pero ang higit na nakakukuha ng simpatiya ng sambayanang Pilipino ay ang mga pangkaraniwang Pilipino na namatay o pinatay habang nagaganap ang labanan sa droga. Sa usaping ito, hati ang opinyon ng sambayanan. Sino ang higit na makasalanan: ang pumatay ng inosente o ang pumatay para sa mga inosente? Sino ang higit na makasalanan: ang naghuhugas ngayon ng kaniyang kamay o ang humuhugas sa kamay ng maysala? Pero may mali talaga rito. Tsk.

Pagsuko, Pagtulong, at Pagbabago
Sa positibong pagtanaw, may mga durugista namang kusang sumuko/sumusuko na naghahangad na makapagbago sa suporta ng pamilya, ng pamahalaan, at ng mga mamamayan. Inaayawan man natin ang mga seremonya ng kanilang pandedemonyo habang nasa ilalim ng espiritu ng ipinagbabawal na gamot, huwag naman sana nating ayawan ang kanilang sarili bilang tao. Lahat tayo ay may karapatan, kabilang na rito ang karapatan upang mabuhay at magbagong-buhay.

Ang mga sumuko ay nangangailangan ng rehabilitasyon upang maibalik sila sa normal na pamumuhay. Mabuti rin ang epekto ng pamilyang sumusuporta sa rehabilitasyon ng kanilang kapamilya na nalulong sa droga. Ang paglalaan ng pondo (makatarungang pondo) ng pamahalaan para sa rehabilitasyong ito ay siya namang magpapasulong sa mas malawakang pagbabago.

Kailangan ding tulungan sa paraang sikolohikal at espiritwal ang mga pamilya ng mga na-EJK dahil sa droga. Alalahanin nating may mga magulang na naghihinagpis dahil nawalan sila ng anak; may mga asawa na nabalo at nawalan ng katuwang sa buhay; at higit sa lahat maraming musmos ang nawalan ng mga magulang at wala pa silang muwang sa kinabukasang kahaharapin nila. Higit silang nangangailangan ng suporta.

Bilang pagwawakas, hindi solusyon ang pagpatay sa pagsugpo sa droga. Wala man akong maibigay na pinakamainam na solusyon sa ngayon, naniniwala akong hangga’t may buhay, ang tao ay may pag-asang magbago. At ang pagbabagong ito ay higit na mapagtatagumpayan kung malinis rin ang ating hangarin na sila ay matulungan.

###
Ang post kong ito ay opisyal kong lahok sa Saranggola Blog Awards 9 http://www.sba.ph/sa kategorya ng Sanaysay.
Saranggola 336x280

Advertisements